Esser in Freak vul dir esser in tip flippà, spezial, divers, nar. Freaks èn umans che nodan plitost cunter il current da la societad, che vulan esser auter. En quel senn è atgnamain mintga vair cristian in Jesus Freak. Tuttina danunder che ti vegns, na ta lascha betg impedir d’insatgi dad ir tar Jesus!

Jesus è la part fundamentala e la pli impurtanta da tut, Sche ti n’es betg segir, schebain ti es in cristian u betg, n’es ti cun gronda probabilitad nagin. Ina chaussa uschè impurtanta san ins simplamain. Jesus è il center da tia vita. El è tes ami, el viva cun tai, tutina tge che ti fas e nua che ti es. La Bibla di ch’il “cor” saja il center da mintga uman. El è ina sort da centrala, ina sutga da commando, sco en ina nav spaziala. Sin quella sesa per ordinari tes “ego”. Ti guidas e dirigias el ed uschia decidas ti en tge direcziun che ti vuls ir. Forsa fas ti mintgatant schizunt uraziun e vas en baselgia. Ma Jesus di: Quai na tanscha betg, jau sesess gugent sin tia sutga da commando e guidass tia nav spaziala! Forsa has ti tema da quai, quai chapesch jau fitg bain, ma i vala la paina da ta fidar dad el. El enconuscha tia vita en mintga detagl e sa tge ch’è il meglier per tai. Atgnamain datti mo ina suletta regla per daventar in Jesus Freak: Jesus daventa il schef en tia vita. En l’entir univers datti mo ina suletta persuna che po prender questa decisiun, e quai da libra voluntad: questa persuna es ti. La suletta chaussa che po impedir insatgi da far quest pass è la luschezza: “Jau vegn da far tut quai sulet, jau n’hai betg basegn d’agid, da perdun e d’amur”. Cun ina tala tenuta ans engianain nus sezs. Jesus vul mo il meglier per nossa vita, quai è forsa schizunt meglier ch’il bun che nus avain fin ussa.

Jesus,

jau vi empruvar da viver mia vita cun tai. Davent dad oz duais ti esser il schef en mia vita. Ma perduna che jau hai vivì fin ussa senza tai. Ma perduna ils malpass che jau hai fatg en mia vita, cun ils quals hai jau vulnerà tai, mai ed auters. Fa il bain e destruescha ils obstachels tranter tai e mai ed emplenescha mes cor. Jau conced che jau hai basegn da tai e che jau na poss betg viver senta tai. Grazia che ti ma prendas serius, grazia che ti ma taidlas e che ti na m’abandunas mai.

Amen.